പ്രത്യേക തീവ്ര വോട്ടർ പട്ടിക പരിഷ്കരണത്തിന് തുടക്കം കുറിച്ച് കോഴിമല രാജാവ് രാമൻ രാജമന്നാന് ആദ്യത്തെ എന്യൂമറേഷൻ ഫോം ജില്ലാ കളക്ടർ ഡോ. ദിനേശൻ ചെറുവാട്ട
ഇടുക്കി: പ്രത്യേക തീവ്ര വോട്ടർ പട്ടിക പരിഷ്കരണത്തിന് ജില്ലയിൽ തുടക്കം. കോഴിമല രാജാവ് രാമൻ രാജമന്നാന് ആദ്യത്തെ എന്യൂമറേഷൻ ഫോറം ജില്ലാ കളക്ടർ ഡോ. ദിനേശൻ ചെറുവാട്ടിന്റെ സാന്നിധ്യത്തിൽ ബൂത്ത് ലെവൽ ഓഫീസർ കൈമാറി. ഇലക്ടറൽ രജിസ്ട്രേഷൻ ഓഫീസറും ഡെപ്യൂട്ടി കളക്ടറുമായ മിനി കെ. തോമസ്, കാഞ്ചിയാർ വില്ലേജ് ഓഫീസർ വി.ജെ. ബിജുമോൻ എന്നിവർ ഒപ്പമുണ്ടായിരുന്നു.
2002ലെ വോട്ടർപട്ടികയെ അടിസ്ഥാനമാക്കിയാണ് എസ്ഐആർ നടത്തുന്നത്. ബിഎൽഒമാർ നിലവിലെ വോട്ടർമാർക്ക് എന്യൂമറേഷൻ ഫോറങ്ങൾ എത്തിക്കും. പുതുതായി വോട്ട് ചേർക്കാൻ ഫോറം ആറും ഒഴിവാക്കാൻ ഫോറം ഏഴും തിരുത്താനോ വോട്ടുമാറ്റാനോ ഫോറം എട്ടുമാണ് നൽകേണ്ടത്. താത്കാലികമായി സ്ഥലംമാറി നിൽക്കുന്നവർക്ക് ഓണ്ലൈനായും ഫോറം സമർപ്പിക്കാം.
ലഭിച്ച അപേക്ഷകളുടെ അടിസ്ഥാനത്തിൽ കരടു വോട്ടർപട്ടിക തയാറാക്കേണ്ടത് നിയമസഭാ മണ്ഡലത്തിൽ നിയോഗിച്ചിട്ടുള്ള ഇലക്ടറൽ രജിസ്ട്രേഷൻ ഓഫീസറാണ്. രേഖ ആവശ്യമുള്ളവർക്ക് ഇആർഒ നോട്ടീസ് അയയ്ക്കും. പിന്നീട് അന്തിമപട്ടിക പ്രസിദ്ധീകരിക്കും. അന്തിമപട്ടികയിൽ പരാതിയുണ്ടെങ്കിൽ ആദ്യം ജില്ലാ കളക്ടർക്ക് അപ്പീൽ നൽകാം.
പരിഹാരമായില്ലെങ്കിൽ സംസ്ഥാന തെരഞ്ഞെടുപ്പു കമ്മീഷണറെ സമീപിക്കാനുള്ള അവസരവും സമ്മതിദായകർക്ക് ഉണ്ടായിരിക്കും.
ഫോം വിതരണവും ഡിജിറ്റൈസേഷനും താലൂക്ക് തലത്തിലും ജില്ലാതലത്തിലും കണ്ട്രോൾ റൂം വഴി നിരീക്ഷിക്കും.